top
logo


Home Poesia sarda Trintasêse pro sa morte de Angelìnu Cau
Trintasêse pro sa morte de Angelìnu Cau PDF Stampa E-mail
Valutazione attuale: / 14
ScarsoOttimo 
Scritto da Clementino V. Fanari   
Lunedì 03 Agosto 2009 14:48

Angelìnu ti ses mortu e m’has lassàdu

cun tristùras e penàs in su coro,

giustu a s’edade de vintises’annos.

Chie t’hat zuttu luttuosos pannos,

sunu donzi minutu dolorosos,

chie t’hat zuttu pannos luttuosos

sunu dolorosos a donzi minutu,

chie pannos luttuosos t’hat zuttu

ti tenìat che fizu e bonu frade.

Angelìnu ti ses mortu e m’has lassàdu

cun tristùras e penàs in su coro,

giustu a vintises’annos de edade.

Goses in chellu un’eternidàde

e ti riposes cun babbu tou bellu

e un’eternidàde goses in chellu

e cun babbu tou bellu ti riposes,

e un’eternidàde in chellu goses

e prega pro chie lassas in disgustu.

Angelìnu ti ses mortu e m’has lassàdu

cun tristùras e penàs in su coro,

a vintises’annos de edade giustu.

E cosa de suffrìre non est custu,

a ti che sepellire in tale losa,

 e de suffrìre custu non est cosa,

in tale losa a ti che sepellire,

e custu non est cosa de suffrìre,

ca fist’in bidda s’unicu tesoro.

Angelìnu ti ses mortu e m’has lassàdu

giustu a s’edade de vintises’annos,

cun tristùras e penàs in su coro.

Pro cantu so vivente m’addoloro,

t’hat sentìdu e piantu meda zente,

m’addoloro pro cantu so vivente,

ca meda zente t’hat sentìdu e piantu

m’addoloro vivente so pro cantu,

siat in bidda che in terra anzena.

Angelìnu ti ses mortu e m’has lassàdu

giustu a s’edade de vintises’annos,

cun tristùras in su coro e pena.

Sa maladìa t’hat fattu cangrena

pro essere in sa gloria soddisfattu

sa maladìa t’hat cangrena fattu

 pro essere soddisfattu in sa glorìa

cangrena t’hat fattu sa maladìa

e ti c’hat postu in sa sepoltura.

 Angelìnu ti ses mortu e m’has lassàdu

giustu a s’edade de vintises’annos,

cun  penàs in su coro e tristùra.

E si podes de mie tene cura,

ca custas lodes sunt fattas a tie

e si podes tene cura de mie,

ca pro te sunu fattas custas lodes

e tene cura de mie si podes,

non mi lasses gài isconsolàdu.

Cun tristùras e penàs in su coro,

giustu a s’edade de vintises’annos,

Angelìnu ti ses mortu e m’has lassàdu.

In cussa tumba chi ses sepultàdu,

onzi mese ti falet sa columba,

chi sèse sepultàdu in tale tumba

sa columba ti falet onzi mese,

in sa tumba chi sepultàdu sèse,

medas t’hana pregàdu a pil’isortu.

Cun tristùras e penàs in su coro,

giustu a s’edade de vintises’annos,

Angelìnu m’has lassàdu e ti ses mortu.

Fizu de mamma tua su cunfortu,

in agonizu l’has posta tott’in d’ûa,

fizu de su cunfortu e mamma tua

tott’in d’ûa l’has posta in agonizu

de mamma tua su cunfortu fizu

ca ti teniat in coro e in sinu.

Cun tristùras e penàs in su coro,

giustu a s’edade de vintises’annos,

m’has lassàdu e ti ses mortu Angelìnu.

Invita a su fiancu a Clementìnu,

approffitta e non fettas de mancu,

a Clementìnu invita a su fiancu

 non de fettas de mancu e approffitta,

a Clementìnu a su fiancu invita,

e beneitta sa ‘oghe chi tenìas

cantende cuddas tuas melodìas.

 

Poesìa composta nel 1943

Ultimo aggiornamento Lunedì 03 Agosto 2009 15:07
 

bottom

Powered by Joomla!. Warning: call_user_func() expects parameter 1 to be a valid callback, function 'tdo' not found or invalid function name in /web/htdocs/www.monteualla.it/home/public/templates/colourful-world/html/pagination.php on line 153 Valid XHTML and CSS.

 © 2014 www.monteualla.it - tutti i diritti riservati - Web Master Dario Secci Asuni
 www.bakumeteo.it
Tutti i contenuti sono di proprietà dei rispettivi autori - vietata la riproduzione