top
logo


Home Poesia sarda Gara poetica - Zizi, Masala, Porcu - 2004 - Asuni: gara poetica ottobre 2004
Gara poetica - Zizi, Masala, Porcu - 2004
Gara poetica - Zizi, Masala, Porcu - 2004 - Asuni: gara poetica ottobre 2004 PDF Stampa E-mail
Valutazione attuale: / 178
ScarsoOttimo 
Scritto da Antonio Fanari   
Lunedì 03 Agosto 2009 17:48
Indice
Gara poetica - Zizi, Masala, Porcu - 2004
I tema: sa lagrima, su sambene, su sudore
I tema pag,1
I tema pag.2
I tema pag.3
II tema: su ruju, su nieddu, su biancu
II tema pag.2
II tema pag.3
Duine e varie
Sonetti a Santa Vida
Tutte le pagine

 

 20-Masala (Sambene)

 

Bernardu chi ‘e poetas ses su mastru

Ca dogni versu tou est’unu lizu,

De i sa fama che tenes in s’astru

Però como permittimi un’aizu,

Pianghes si ti moridi unu fizu

Ma non pianghes po unu fizastru,

Ca cussu non t’est fizu e nè parente

E su sambene sou est differente.

 

21-Porcu (Sudore)

Però sa parte mia la prevedidi

La rispettat e bene mi l’onora,

Si est in galera no de coro bi enidi

Pianghet ca in cue bidet ogni aurora,

Ma si sorte tenede de andare a fora

Si chircada unu bellu mestieri,

Cuntentu su suore lu ponede in usu

E a piangher non bi pensat piusu.

 

22-Zizi (Lagrima)

Addite mi ponides in fastizu

Non cherides cumprender sa rejone,

Ogni lagrima est dende unu consizu

Po chie fizas tenede, attenzione,

Pensade a sa sentenzia ‘e Salomone

Cando duas mama lottant pro unu fizu,

Solu da una lagrima sincera

Hat connottu cal’est sa mamma vera.

 

23-Masala (Sambene)

O Porcu chi mi ses a i cuss’ala

Ses pro Asune su poeta nou,

E lassami su suore a una ala

Chi est’ liquefattu che i su brou,

Però dognunu dà su sambene sou

E che l’inserrana in d’una fiala,

Chie su sambene dada est donadore

Ma non si podet donare su sudore.

 

24-Porcu (Sudore)

Ma semper cussa parte mi appartenede

Permitti Ti l’ispiego a presenzia,

Ca de donare appo cumpetenzia

Cun sa parte chi a mie appartenede,

Su tribagliu meu in beneficenzia,

Lu dò a chie bisonzu in s’ora tenede,

Cando est caridade fatto cuss’impreu

Già sò donende su sudore meu.

 

25-Zizi (Lagrima)

Ma sas lagrimas bido sempre in portu

Finas Omeru s’esempiu hat dadu,

Cando in su guerru han’isfidàdu

Ettore e Achille ed Ettore est mortu,

Priamu pianghende a pil’isortu

A sa tenda d’Achille est arrivàdu,

Achille cussas lagrimas cumprendede

E cummòvidu a Ettore li rendede.

 

26-Masala (Sambene)

Cun tegus happo cantàdu contìinu

In su cursu ‘e sa carriera intrea,

Persighinde sa vida in su caminu

Non sò inoghe pro ti dare pelea,

Ma leamus s’esempiu de Enea

Chi si antat de sambene divinu,

Ca sa parte e su sambene est sa prima

Non pensada a sudore nè a lagrìma.

 

27-Porcu (Sudore)

Ses bravu unu poeta isolanu

Mala parte chi faghese in sa gala,

Ma si de Troia piangat cussu a s’ala

Finas deo già b’intro a pianu a pianu,

Enea leat su fizu a sa manu

Ue ‘nd’essit cun su babbu postu a pala,

Cun su sudore chi hat tentu cumpetenzia

De salvare sa sua discendenzia.

 

28-Zizi (Lagrima)

Cun Ettore e Achille sò partìdu

Priamu non li bastat lagrimende,

Da sa mitologia amus ischidu

Ch’importanzia a sa lagrima sun dende,

Su die chi fit Paride naschìdu

Hana bidu a Cassandra lagrimende,

Est’istàda sa lagrima indovina

Annunziende de Troia sa rujna.

 

29-Masala (Sambene)

A su collega meu Irgolesu

Li torro sa risposta giusta giusta,

In d’una bella sala che i custa

Tue a s’ala  manca e deo in mesu,

Chie est mortu ammenta chi difesu

Sa patria de sambene infusta,

Però  est de fusile o de ispada

Fora su sambene ateru non b’ada.

 

30-Porcu (Sudore)

Ma su suore no ‘nde faghede ischifu

Ca issu contat sempere importante,

Si chircas mitologia in cust’istante

Pares a mie fattende su tifu,

Ammenta, una rocca ispinghe Sisifu

E sa terra muntenede Atlante,

E tando bides chi custa parte mia

Est forte finas in mitologìa.

 

31-Zizi (Lagrima)

Mariu s’ottava tua l’appo intesa

E de la giudicare sò in grados,

Si mi citas esercitos pagados

C’andana a s’iscontrare cun lestresa,

Ue sun’interrados sos soldados

Mortos senza sa patria sa difesa,

Su sambene asciutàdu ‘nch’est da ora

Sas lagrimas falende sun’ancora.

 

32-Masala (Sambene)

In custu palcu isprovvistu e laru,

De fronte a unu populu cumpattu,

Ti l’ispiego chiaru, chiaru,

O caru Porcu, ca non sò distrattu,

Cando su sambene est liquifattu

Cussu miraculu est de San Gennaru,

E Tue mi ‘nchi ‘essis in Sisifu

Chi a l’intendere mi faghede ischifu.

 

33-Porcu (Sudore)

Però Mariu non sias attrividu

Ca finas cussu contu est prodigiosu,

Amitto su sordadu est valorosu

In su fronte sa vida hat perdìdu,

Ma si a Ercole tenides famosu

Est ca doighi fadigas hat cumprìdu,

Cun su suore hat mustradu sos brios

Pulid’istallas a deviat sos rios.

 

34-Zizi (Lagrima)

Bi sò deo inue bi hat rujna

Inue a bortas s’omine est crudele,

Non est lagrima dulche che i su mele

Lagrima chi a s’amaru est vicina,

Bidimusu ite faghede Israele

In sos terrinos de sa Palestina,

Intendimus faeddare dogni tantu

S’importanzia ’e su muru e su piantu.

 

35-Masala (Sambene)

Una gherra no est un’isposonzu

Che duos in’amore sun unidos,

Ma sos esempios già los amos bidos

E ‘nde su populu intreu distimonzu,

E si b’hat gherra e b’hat feridos

In cue tenent de sambene bisonzu,

E  aditte chi andasa e chi ti frimmas

Chi non tenes bisonzu de lagrimas.

 

36-Porcu (Sudore)

De silacca lassàde sa puntiglia

Non mi chelzo reduire a cussu accabbu,

Ma si e su suore s’ispiego su grabbu

Su chi in vida tenede ogni meraviglia,

Ogni die suerada unu babbu

Si tenede de campare sa famiglia,

In su postu de tribagliu est presente

Suerende ogni die onestamente.

 

37-Zizi

Cando apparede in ojos premurosa

Sa lagrim’est signale de amore,

Pensade a Maroncelli in su dolore

Cando li segan s’anca cangrenosa,

Regalada una rosa a su duttore

Non podinde a li dare attera cosa,

Da issu su dottore si ‘nche franghede

E accettada sa rosa pianghede.




Ultimo aggiornamento Lunedì 03 Agosto 2009 18:39
 

bottom

Powered by Joomla!. Warning: call_user_func() expects parameter 1 to be a valid callback, function 'tdo' not found or invalid function name in /web/htdocs/www.monteualla.it/home/public/templates/colourful-world/html/pagination.php on line 153 Valid XHTML and CSS.

 © 2014 www.monteualla.it - tutti i diritti riservati - Web Master Dario Secci Asuni
 www.bakumeteo.it
Tutti i contenuti sono di proprietà dei rispettivi autori - vietata la riproduzione