A VALERIU

E tui puru s’arriu as passau

chen’e manu amiga o de parenti,

però scideus chi luttu as lassau

che fradi e fillu de totu sa genti,

mancai finzas su prus disfortunau.

Cun tui Asuni torra at interrau

un aturu becciu testimongiu

de unu mundu ch’est giai spacciau

e fusti de is chi prus at supportau

dolori antigu e antigu abbisongiu.

As biviu solu e diseredau

campendi casi sceti ‘e caridadi

chi, rispettendidì sa dignidadi,

mai sa ‘idda t’at fattu mancai,

sa propiu chi t’at ‘ofiu accumpangiai

finzas a s’enna de s’eternidadi.

T’at abetau genti di ‘ogn ‘edadi

In “Putzu Nou”, innui ses arribau;

cumpangìa, su nou bixinau,

t’at a fai’ in s’ierru e in s’istadi;

pinnigau affaci ‘e su nuraxi

t’at affestau in su logu ‘e sa paxi.

E nosu ti sigheus a pensai

sonendi sa trumbitta in giru e in prazza,

che banditori crispu e di arrazza

t’eus a tenni’ sempir’ in memoria

e aici ti ‘oleus arregordai.

Adiu, Fogazza, e a sa Santa Gloria.

 Pep' 'e Ualla