A SA IDDIXEDDA MIA

Pitica e beni posta in d’unu pranu

Fust’in tempus antigus bidda mia;

is bentos ti fadiant titia

cun d’unu clima friscu, siccu e sanu;

su nuraxi, de tui prus anzianu

t’hat issu puru fattu cumpangia,

fattu de gent’’i azza forti e bia

castiàt de cabesusu a Campidanu:

Fust’ arrica ‘e padentis, ch’in beranu

Ti bestiant totu di alligria;

bestiamini aresti e masedu

cun d’un’arriu arricu de piscau

fu’ sa sienda, impari cun sa genti

pobera, ma ch’hiat sempri trabballau.

Candu su fogh’’e Prammas abbruxau

t’hiat finzas is pedras,

cambiada ti fusti prus a basciu

e ses ancora innia

sempiri prus pitica, prus dromia

e timu chi tui pozzas isparessi.

Candu ti pensu hia a boll’arrennesci’

de ti scì’ prus unìa, cun sa genti

prus attiva de immoi, meda prus bia,

e su sartu torrau a unu padenti.

Chi ti castiu cumenti ses torrada

mi bincit sa  tristura, mi enit su spantu,

po chistionai cun sa genti stimada

finit chi dep’andai a campusantu.

T’hia a bolli’bir’impressi cambiada,

però allestru, immoi chi seu biu,

cumenti meda bortas sonniada

t’hapu cun bisu innozenti de pippiu.

     Pep' 'e Ualla